حالة نفسية غير مستقرة

تدوينة ع السريع كدة .. بعد ربنا ماكرمنى بمكان كويس فى الجيش والحمدلله ومعاملة طيبة من القادة هناك .. بس بردو فيه حالة نفسية غير مستقرة مش عارف ليه ، اسباب كتير بتدور فى دماغي طول الوقت

• جايز بعد عن شغلى اللى عمرى ماتصورت انى اغيب عنه 24 ساعة ؟؟
• جايز لانى هنك برغم وجودي في مكان كويس باعمل اللى هم عاوزينه مش اللى انا عاوزه؟؟
• جايز لانى بعدت عن روح فريقي اللى فضلت ملزمانى 9 شهور ؟؟
• ولا جايز لانى عاوز ابدأ فى مشروع من المشاريع المتخططة بقالها شهور وماليش نفس ؟؟

كل دي اسئلة بتدور جواايا ومش عارفلها جواب .. كل اللى اتمناه ان ربنا يعدي افترة دي على خير .. وبالمنسبة اشتركت فى مسابقة SWcairo اللى هتكون من 19 لحد 21 يناير اللى احنا فيه ويا رب اقدر اشارك فعلا وماتكونش استكمالا لسلسلة الضيق اللى انا فيه … كفاية كدة

سلام عليكم

أنا جيت :D

بقالى كتير مش باكتب هنا لكن ناوي ان شاء الله اخصص المدونة دي بعد كدة لكتابة اخباري الشخصية والمدونة التانية للشغل والحاجات التقنية .. المهم انه وحشني التدوين جدا بعيد عن التقنيات ودلوقت بافكر فى كام حاجة وكام مشروع ان شاء اللله لو تم الانطلاق فيهم هيكون انطلاق جديد لحلم جديد وانا اتعودت من ربنا انه مش بيخزل احلامي زي ماخزلنيش فى حلمي الاولاني

دلوقت بقى ايه ؟ يعنى انا فى الفترة دي قررت ايه وناوي اعمل ايه ,, وان شاء الله فى تدوينات جاية اقولكم على اخر الاخبار على طول .. انا بس حابب قبل ماخلص اقولكم انى مش عاجبني حال البلد ونفسي يتغير بقى واحس بتقدم .. وبالمناسبة عاوز اقولكم انى حتى مش قادر اتوقع البلد ممكن تهدأ امتى او احس اننا بقينا على اول سلم النجاح .. لو حد يعرف ياريت يقولى ويطمنى .. واخر حاجة حابب اقولكم انى اسبوع فى البيت واسبوع فى سويسرا يعنى مش جيش اوى يعنى

اشوفكم على خير ان شاء الله .. سلام

MedhatDawoud.com

Tonight isA the site will be published .. and this isn’t mean to closing this blog .. this blog will be about my stories and personal topics .. hope to find all of you there .. http://www.medhatdawoud.com

عودة للتدوين

متابعى مدونتى العزيزة .. اسف على البعد للفترة الطويلة دي ..

وان شاء الله اعود للتدوين فى الفترة القادمة ولعل اول ما يمكن العودة به فى التدوين

اننى انتهيت والحمدلله من الدراسة الجامعية تماما واصبحت خريج

.. وتم ترشيحي مبدأيا كظابط احتياط فى الجيش

وسوف اناوب باخباري ان شاء الله فى القريب العاجل …. ربنا معايا  ان شاء الله

بداية عقد جديد .. عقد العشرينات

سلام عليكووو

انهاردة 11 ابريل ذكرى ميلادي الواحد وعشرين بداية العقد الثالث من حياتى .. كل مابص ورايا فى العقد اللى فات من حياتى وافكر انا استفدت منه ايه او افدت فيه مين .. مش بالاقيني انجزت كتير لكن على كلا انا حاسس انى انجزت واستفدت حاجات بسيطة اوى يمكن كان نفسي انجز اكتر منها بكتير .. بس الحمدلله على اللى قدرت اوصله

الفترة اللى جاية فى حياتى فترة عصيبة ومش عادية .. عمري ماهاقدر اعوضها مرة تانية .. نفسي احقق فيها حاجات كتير وفيه ليا احلام كتير .. ربنا يوفقنى واحققها .. مستقبلى كله واقف على هذا العقد القادم من حياتى .. يا رب وفقنى ويكون احسن من اللى فات يا رب

يلا بقى كل واحد ياخد حتة من التورتة دي

لك الله يا حاسبات

قسم بالله انا اتخنقت وجبت اخري منها خلاص .. ادى المحادثة اللى حصلت بيني وبين العميدة انهاردة ويا ريتني مادخلتلها

انا مدحت داود الفرقة الرابعة علوم حاسب اللى جيت الاسبوع اللى فات كنت باكلم حضرتك لو ممكن ناخد مدرج فى وقت ماهو فاضي بس

قالتلى ماحنا بعتنا لنائب رئيس الجامعة ولسة الرد ماجاش

قولتلها انا كنت عند حضرتك يوم الاتنين وقولتليلي اجى الاربعاء

قالتلى ايوة بس جالى بعديك كذا واحد بردو بنفس الطلب فبعت لنائب رئيس الجامعة ولسة الرد ماجاش

قولتلها طيب من وجهة نظر حضرتك هل ممكن يرفض

قالت محتمل اه .. انا ماعرفش

قولتلها طيب من وجهة نظر حضرتك ممكن يرفض ليه ؟

قالت انا ماعرفش انتوا هتعملوا ايه ولا اضمن اذا كان بتاخدوا فلوس او لا ولا بتعملوا دعاية او غيره

باقولها هنعلم بعض فى اوقات الفراغ

قالت انا مش مسؤليتي دى

قولتلها عاجبك مستوى الطلبة كدة ؟؟

تقولى هم مبسوطين كدة يروحوا ياخدوا كورسات ولا هم حرين ..

طيب انا مش عاوز معمل ولا هاستعمل الاجهزة اصلا انا بس عاوز مدرج

تقولى وانا ايه يعرفني ان الموضوع مش ربحي او اعلاني

قولتلها خدي الضمانات اللى انتى عاوزاها لو عاوزانى امضيلك بده موافق

تقولى انا بعت لنائب رئيس الجامعة ولسة الرد ماوصلش

اقولها يا دكتور الموضوع ابسط من كدة وممكن حد من هيئة التدريس يحضر معانا لان كلنا حاسبات فى بعض ومش هندخل حد من بره

تقولى مافيش طالب بيشرح لطالب .. انا كنت شغالة 35 سنة وقبلها 5 سنين كلية ماشوفتش طالب بيشرح لطالب

قولتلها يا دكتور صحابنا فى هندسة بيعملوا كدة ومش غير اوراق ولا اى موافقات كتير لطالما المدرج فاضي او البلوك ماحدش بيمنعهم من حاجة

تقولى لا ماشوفتش كدة ولا اعرف كدة

اقولها يا دكتور طيب احنا قادرين على اننا نعلم بعض وفينا كفاءات

تقولى مانا لو سيبت الموضوع مفتوح كله هيجي .. وانا جالى اتنين غيرك بعد انت ما جيت الاسبوع اللى فات .. فلاقيت الموضوع هيفلت

قولتلها طيب مانا عندي اقتراح بسيط .. هو ان الدكاترة بتوعنا اللى كويسيين اوى دول يعملوا انترفيو مع الطلبة واللى مش عنده القدرة مايتكلمش تانى وانا اولهم .. طالما حضرتك مش موافقة على الكل وفعلا الكل مش كواليفايد لانه يشرح حاجة.

تقولى انا ماليش دعوة وماقدرش اقول حاجة .. انا اخد الموافقة من نائب رئيس الجامعة وابقى فى الشرعية وبعديها لو حتى عاوزين تاخدوا فلوس خدو ماليش دعوة

قولتلها ماهو حضرتك كدة هتساوى الكل بالكل وحتى اللى عاوز يتكلم فى اى حاجة او يعلن عن اى حاجة ممكن يتكلم عادى

قالتلي ايوة بس انا اكون فى الشرعية وماليش دعوة بعد كدة

قولتلها احنا اتقدمنا بالطلب ده من السنة اللى فاتت مرة واللى قبلها مرات وبردو اترفض ليه ما نظرتيش فى الامر ؟

تقولى لانى مش ضامنة انه يكون لا ربحي او ما الى ذلك

قولت فى عقل بالى …. منك لله بجد ومنه لله اللى جابك لينا اما انتى مش حاسة بالطلبة بتوعك مين اللى هيحس بيهم

وفى النهاية قالتلى ابقى سيب اسمك ورقم تلفونك وهنبقى نكلمك لو جد جديد كأنى كنت فى شركة باعمل انترفيو واترفضت

لك الله يا حاسبات